Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру» бағдарламалық мақаласы ел дамуының жарқын үлгісі мен нақты қадамдарын көрсететін келелі ой, салиқалы пікір, батыл шешімдерге құрылған маңызды құжат. Осы бағдарлама аясында қазақ тарихында төл мәдениетіміз тұңғыш рет әлемнің барлық құрлықтарына жол тартып, басты тілдерінде сөйлей бастады. Ұлт мақтанышы болған біздің бұрынғы батыр бабаларымыз, данагөй билеріміз, жырауларымызбен қатар өнер саңлақтарының есімдері қайта түлей бастады. Ендеше, сондай өнер тарландарының бірі әнші, актер, әрі музыкант Әміре Қашаубаевтың туғанына 130 – жыл толуына орай 2018 жылдың 10-шы тамыз күні № 3 кітапхананың оқу залында «Дала бұлбұлы» атты музыкалық кеш өткізілді. Музыкалық кешке кітапханамыздың қазақ клубы «Шаңырақ» ұжым мүшелері, Қостанай әлеуметтік – техникалық университетінің мұғалімі, және кітапханамыздың оқырмандары қатысты. Іс – шара барысында оқырмандар назарына ұлт мақтанышына айналған 20-ғасырдың өнер қайраткері, Әміре Қашаубаевтың өмірі және шығармашылық жетістіктері туралы деректі фильмнен үзінді, Парижде шырқаған «Балқадиша» «Дудар – ай», «Ағаш аяқ» т.б. сияқты өлеңдерінің таспаға жазылған әндері тыңдалды. Әміре Қашаубаев туралы жазылған кітаптар, газетке шыққан мақалалардан құралған көрме ұйымдастырылды. Кеш соңында атақты Әміре Қашаубаев салған әндер «Шаңырақ» клубы мүшелерінің орындауында аспаппен сүйемелденіп шырқалды.